Малайзиядә авариядә һәлак булган гашыйк парның әти-әнисе аларның өрәкләрен өйләнештергән. Бу турыда «AsiaOne» басмасы яза.
Перак штатыннан 31 яшьлек Юн Кэн Шань һәм 33 яшьлек Лээ Сюэин 3 ел очрашып йөргән һәм өйләнешергә җыенган. Әмма 24 майда алар авариягә очрый. «Ашыгыч ярдәм» табиблары да аларга ярдәм итә алмый. Шань Сюэинга үзенең туган көнендә – 2 июльдә тәкъдим ясарга җыенган була.
Туганнары некрологларда яшьләрне өйләнешкән пар дип күрсәтергә уйлый. 27 майда гаилә кремация алдыннан алар өчен өрәкләр туе уздыра. Бу гореф-гадәт исән вакытта ир белән хатын була алмый калган гашыйкларның җаннарын кавыштыру өчен эшләнә. Туганнары Шань һәм Сюэинның махсус туй фотосын да ясый.
«Аның (Шаньның) әнисе бездән, ниһаять, йөргән кызларыбызга өйләнәбезме-юкмы, дип сорады. Без елмаеп кына куйдык, чөнки икебез дә тәкъдим ясарга җыенган идек. Хәзер ул бу хыялын беркайчан да чынга ашыра алмый инде», – дип сөйләгән Шаньның балачак дусты.
