Тәтешле районында «Хәния Фәрхи көне» узган.
Ул район үзәгендә Хәния Фәрхи һәйкәленә чәчәкләр салу белән башланган. Аннары Мәдәният йортында бәйге узган, соңыннан Гала-концерт үткәрелгән.
Хәния Фәрхинең сеңлесе Фирүзә Ибәтуллина килгән тамашачыларны «Безнең Кояшыбызның туган көне!» дип сәламләгән. «Кибеткә керәм – Хәния җырлый, эшкә керәм – Хәния җырлый, машина үтеп китсә – Хәния җырлый. Бу Хәния яши дигән сүз», ди ул.
Фирүзә Ибәтуллина бәйгедән һәм Гала концерттан видеолар куйган.
«Хәния апаның рухы да сәхнәдә булды: без моны белеп, сизеп тордык. Шуңа тамаша көтелгәннән дә уңышлырак килеп чыкты! Кайчак концерттан соң төне буе сәхнәдәге хезмәтеңә бәя биреп чыгасың: менә бу урында болай әйтәсе калган, бу сүз урынлырак булыр иде, ә монысын әйтми калырырга иде, шигырь укыганда бу урында интонацияне болайрак эшлисе иде икән лә... Ахыр чиктә чыгышыңнын бик аз өлеше белән генә канәгать каласың. Ә кичә рәхәтләнеп, «йөзеп» алып бардым. Сәхнәдәге хезмәттәшем-алып баручы Гөлзадә, монда, әлбәттә, синең өлеш әйтеп беткесез! Бер-беребез белән концерт башланырга санаулы гына минутлар кала танышсак та, тамашачылар әйтүенчә, «сәхнәдә аерылгысыз бербөтенгә» әйләндек. Сәхнәдә бер-беребезне күз карашларыннан аңлап эшләдек (бу алып баручылар өчен бик мөһим!). Иҗатыгыз – уңышлы, уңышларыгыз дәвамлы булсын, рухташлар!» – дип язган ул.
