Арча районы Яңа Кенәр авылыннан махсус хәрби операциягә киткән Айдар Һадиев һәлак булган.
50 яшенә якынаеп килгән ир-ат контракт төзеп киткән булган.
Ул, контракт төзеп, апрель аенда киткән иде. Күпмедер хезмәт иткәннән соң, яраланып кайтты. Берәр айга кайтып торганнан соң, яңадан китте. Аннан соң хәбәре булмады. Бер айлап хәбәргә чыкмагач, кече улы ул контракт төзеп киткән җиргә, Казанга мөрәҗәгать итә. Анда ДНК тапшырып кайткан, әтисен танып була торган билгеләрне әйткән. Берәр атнадан улына хәбәр килә. Без улы сөйләгәннән генә беләбез. Җәсәден поезд белән кайтарачаклар дип хәбәр иттеләр, әлегә башка бер хәбәр юк, кайтып җитмәгән әле, – дип сөйләде Айдар Һадиевнең бертуган энесенең кызы Айгөл ханым.
Мәрхүмнең әти-әниләре бакыйлыкка күчкән. Игезәге дә яшьли гүр иясе булган.
«Минем әти аның абыйсы була, барысы өч абыйсы һәм бер апасы бар. Үзенең ике улы калды. Игезәк сыңары яшьли үлде. Ул вакытта без кечкенә идек. Аны игезәк сыңары янына ук җирләп булмый, анда әби, ягъни әниләре җирләнгән. Болай буласын кем белгән бит. Авыл зиратына җирләрбез инде», – дип сөйләде ул.
Мәрхүмнең туганнары, якыннары, дусларының авыр кайгысын уртаклашабыз. Аллаһы Тәгалә күркәм сабырлык бирсен.
