Җырчы Габделфәт Сафин быелгы концерт сезоны буенча килгән сорауларга җавап биргән. «Нигә Нефтекамскига, Балтачка, Түбән Камага килмисез? График ничек төзелә?» – дип кызыксынучыларга, җырчы концертларны артык еш куя алмаганын, шулай ук аларны еш куярга ярамаганлыгын аңлаткан.
«Көн саен концертлар куеп булмый. Аны яшьләр куядыр. Графикны һәркем үзенең эмоцияләренә, үзенең булмышына карап төзи. Елда 360 көн бар икән, шул 360 көнне дә концерт куеп булмый ул. Чөнки син бушанасың эмоциональ яктан. Бер концерт белән икенче концерт арасында тернәкләнү периоды булырга тиеш.
Хоккейчылар да, мәсәлән, «Ак Барс», көн саен уйнамый бит. Бер уен уйныйлар да, 3 көннән соң гына икенче матч. Шуңа күрә, график төзи башлаганда, араларында синең иң яраткан шәһәрләрең килеп чыга. Кайда җайлы барырга, кунарга җайлы. Коллектив та бар бит әле. Күбрәк үзәк шәһәрләр сайлана», – дип сөйләгән ул социаль челтәрләрдә.
