«Татарстан юлларында үлүчеләр саны артты, һәм моның белән көрәшергә кирәк»
«Халык инспекторы» кушымтасы яңача эшли башлады – юл хәрәкәте кагыйдәләрен бозган очракларны видеога төшергән өчен, хәзер татарстанлылар акча ала алачак. Акчалата премия Административ кодекста каралган штраф суммасының чирегенә тигез булачак.
Бу – чарасызлыктан эшләнде: Татарстан юлларында аварияләрне киметүнең тагын бер ысулы. Күптән түгел республика Министрлар Кабинетында Татарстанның баш дәүләт автоинспекторы Рөстәм Гарипов кайгылы статистика саннарын искә төшерде.
Агымдагы елның 7 аенда республика юлларында 1500дән артык юл-транспорт һәлакәте теркәлгән, аларда 173 кеше һәлак булган һәм 2 меңнән артык кеше төрле тән җәрәхәтләре алган. Рөстәм Гарипов сөйләгән арада, мониторларга республика юлларында 10 ел эчендә һәлак булган 148 баланың исемнәрен чыгардылар. Дәүләт автоинспекциясе башлыгы ассызыклаганча, бу балалар – статистика мәгълүматлары гына түгел, ә чын кешеләр. Быел гына да юл-транспорт һәлакәтендә 8 яшь татарстанлы һәлак булган.
«Бу – ата-ананың гына түгел, җәмгыятьнең дә, дәүләтнең дә югалтуы. Узган ел сентябрьдән октябрьгә кадәр 91 юл-транспорт һәлакәте булган, аларда 7 бала үлгән һәм 92 бала яраланган. Зыян күргән 1 бала да – ул инде фаҗига», – дип билгеләп үтте Татарстанның баш дәүләт автоинспекторы.
Фото: © кушымтадан скриншот
Нинди кагыйдә бозуларны видеога төшергән өчен түләячәкләр?
«Халык инспекторы»ның беренче версиясен 2014 елның ноябрендә үк эшләтеп җибәргәннәр, 2020 елның июнь аена татарстанлылар хокук бозулар турында 300 меңнән артык гариза биргән. Кичә билгеле булганча, «Халык инспекторы» системасы кулланучыларын бүләкләү тәртибе расланган. Карарга ТР Премьер-министры Алексей Песошин кул куйды.
«Халык инспекторы» дәүләт мәгълүмат системасы кулланучыларга махсус кушымта аша мобиль телефоннарда юл йөрү кагыйдәләрен бозу очракларын теркәргә мөмкинлек бирә. Алынган материаллар дәүләт автоинспекциясе бүлекчәләренә алга таба карау һәм хокук бозучыларга карата чаралар күрү өчен җибәрелә. Юл хәрәкәте кагыйдәләрен бозу видеога төшерелә, аның дәвамлылыгы 30 секунд булырга тиеш, ролик турыдан-туры хокук бозу вакытында төшерелергә тиеш.
Кайсы очракта үз күзләрең белән күргән юл хәрәкәте кагыйдәләрен бозу очракларын видеога төшергәндә акча түләнәчәге түбәндәге исемлектә китерелгән.
- Әгәр әйләнә-тирә мохитнең пычрануына шаһит булсаң, автомобильләрдән җитештерү калдыкларын бушату яки агызу: бу хокук бозу видеосы өчен 1 150 сум алырга мөмкин.
- Куркынычсызлык каешын такмаган йөртүче яки мотошлемсыз мотоциклчының видеосы өчен – 300 сум.
- Светофорның тыючы сигналына яки көйләүченең тыючы ишарәсенә баруны видеога төшергән өчен – 300 сум.
- Светофорның тыю сигналы булганда стоп-линия алдында туктау таләпләрен бозган видео өчен – 230 сум.
- Каршы як хәрәкәт полосасына яки каршы як юнәлештәге трамвай юлларына чыгу видеосы өчен – 1 440 сум.
- Җәяүлеләргә хәрәкәттә өстенлек бирмәү видеосы өчен – 435 сум.
- Машина йөртүченең хәрәкәт вакытында телефоннан сөйләшеп барган видеосы өчен – 435 сум.
«Түләнә торган түләү суммасы РФ Административ кодексының кулланыла торган маддәсенең иң аз административ штраф суммасының яртысыннан 50% (салымнарны һәм җыемнарны исәпкә алмыйча) һәм НДФЛны исәпкә алып, РФ КоАП 8.2 маддәсенең 3.1 өлеше буенча административ штраф суммасының 10 процентын тәшкил итәчәк», – диелә ТР Министрлар Кабинеты карарында.
Гади генә итеп әйткәндә, татарстанлы Административ кодекста каралган штрафның тулы суммасының 25% алачак.
Түләүләр юл йөрү кагыйдәләрен бозу турындагы карар законлы көченә кергәннән соң 40 эш көненнән дә соңга калмыйча башкарылачак.
«Халык инспекторы» кушымтасы турында
«Халык инспекторы»ның яңартылган кушымтасын «Kazan Digital Week» халыкара форумында тәкъдим иттеләр. Татарстан Республикасы Цифрлар министрлыгы башлыгы Айрат Хәйруллин аны Татарстан Республикасы Рәисе Рөстәм Миңнехановка күрсәтте. Министр ассызыклаганча, ул аңлы гражданлык җәмгыятен үстерүгә юнәлдерелгән.
«Безнең бурыч – җәмәгатьчелекне машина йөртүчеләрне һәм «Халык инспекторы» мобиль сервисы аша юл хәрәкәте кагыйдәләрен үтәүне контрольдә тотуга җәлеп итү. Ул безгә юл хәрәкәте өлкәсендә хокук бозулар турында таныклыкларны күрергә һәм ЮХИДИга җибәрергә мөмкинлек бирә. Кулланучылар хокук бозу очракларын видеога төшерә ала, мәсәлән: каршы як полосага чыгу, машина кую кагыйдәләрен бозу, хәрәкәт вакытында телефон куллану һәм башкалар», – диде түгәрәк өстәлдә ТР цифрлы үсеш министрының беренче урынбасары Илья Начвин.
Кушымтаның кызыклы үзенчәлеге шунда ки, юл йөрү кагыйдәләрен бозуның шаһиты булган очракта, мәгълүматны кертмичә генә, кушымтаны кабызып, зур кызыл төймәгә басып төшерә башларга мөмкин. Шул ук вакытта автомат рәвештә геопозиция куелачак.
Шулай ук хокук бозу категориясен дә ачыкларга, кушымта көйләүләрендә үз телефон номерыгызны кертергә һәм банкыгызны күрсәтергә кирәк булачак.
Фото: © видеодан скриншот
Дәүләт автоинспекциясенә «Халык инспекторы» кушымтасы аша 21 категория буенча юл йөрү кагыйдәләрен бозу турында хәбәр итәргә мөмкин, әмма аларның җидесе турында мәгълүмат өчен генә түләячәкләр. Кушымта эчендә алар сары бүләкле билге белән күрсәтелгән.
Шулай итеп, юл хәрәкәте кагыйдәләрен бозу турындагы хәбәрләр өчен түбәндәге категорияләр буенча акча алырга мөмкин булачак:
1. җәяүлеләр хәрәкәтенә комачаулык тудыру;
2. светофорның тыючы сигналына бару;
3. светофорның тыюлы сигналы булганда тукталыш сызыгыннан чыгу;
4. каршы як полоса буенча хәрәкәт;
5. тагылмаган куркынычсызлык каешы;
6. хәрәкәт вакытында телефоннан сөйләшү;
7. транспорт чарасыннан калдыкларны агызу.
Кушымтада сезнең заявканың статусын күзәтергә мөмкин булачак, бу аерым кушымта, ул менә шулай күренә:
Фото: © кушымтадан скрин
Якын арада кушымта барлык мәйданчыкларда да барлыкка киләчәк, хәзер ул RuStore да гына мөмкин.
«Хәзерге вакытта кушымтаны RuStore аша урнаштырырга мөмкин, App Store һәм Play Marketта ул модерациянең соңгы этапларын уза. Бу атнада мөмкин булыр дип уйлыйм. ЮХИДИга ярдәм итәчәк кешеләр компенсация алачак. Болар барысы да аерым алынган гражданнарны бүләкләү өчен түгел, ә безнең юлларда беренче чиратта хокук тәртибе булсын өчен эшләнгән», – дип билгеләде Илья Начвин.
«Татар-информ»нан Дмитрий Шатров язмасы тәрҗемә ителде
