Чиләбенең №68 коррекцион мәктәбендә укучы 13 яшьлек укучы иптәшләренә чүкеч белән һөҗүм иткән. Ул чүкечне сак хезмәте аша алып керә алган һәм иртән сумкасыннан чыгарып 09.00 сәгатьтә янәшәсендәге классташларын суга башлый. 3 бала тән җәрәхәтләре алган. Барыннан да бигрәк бер кыз балага каты эләккән – ул реанимациядә. Тагын бер малай һәм бер кыз яраланган. 74ru сайты, каза күрүчеләр 4 кеше дип яза.
Укучы кулга алынган. Аның ни өчен бу адымга баруын тикшерәләр, дип яза SHOT.
74ru сайты язуынча, укучы үзе белән мәктәпкә пычак һәм пневматик пистолет та алып кергән булган. Чиләбе губернаторы Алексей Теслер укучының укытучыларга да һөҗүм итүе, педагогның госпитализацияләнгән булуларын әйткән. «Вәзгыятьне шәхсән контролемә алдым. Тикшерү бара. Укучының мәктәпкә чүкеч алып керүе зур сорау тудыра. Нигә сакчылар бернинди реакция күрсәтмәгән? Барлык уку йортларында тикшерү уздырырга күрсәтмә бирдем», – дип язган ул.
Чиләбе өлкәсендә бала хокуклары буенча вәкаләтле вәкил Евгения Майорова «Агрессив балалар күренеп тора. Һәм мондый хәлләрне вакытында реакция күрсәтеп, кисәтеп була. Дәшми торып түгел, мәктәп җитәкчелеге белгечләргә мөрәҗәгать итәргә тиеш. Ата-аналар контактка бармаса, судка барырга була», – дигән ул.
