Равил Галиев зур бүләк иясе булды: «Бу – бик дулкынландыргыч вакыйга»

Бүген җырчы Равил Галиев «Татарстанның халык артисты» дигән мактаулы исемгә лаек булды. Артист әлеге зур бүләкне нәкъ менә Тукай көнендә кабул итеп алуның аеруча дулкынландыргыч булуын билгеләп үтте.

«Минем өчен бу – бик дулкынландыргыч вакыйга. Әлеге зур бүләкне Тукай көнендә, Тукай премиясе лауреатлары – мөхтәрәм, мәшһүр шәхесләребез белән бергә, шушы күркәм залда, Татарстан Рәисе кулыннан алу – зур дәрәҗә һәм куаныч булды», – диде ул «Интертат»ка.