Зәйнәб Фәрхетдинова үзенең «Тәрәзәңә ай килер» җырын Ильвина башкаруында ишеткән. Социаль челтәрләрдән аңлашылганча, җырчы үзе бу хакта хәбәрдар булмаган.
Зәйнәб Фәрхетдинова бу уңайдан үзенең фикерен дә язып калдырган.
«Кызык инде бу дөнья! Кызганыч та!
Әле күптән түгел генә, халык яратып тыңлагач, яңа форматта «Тәрәзәңә ай килер» җырын кабат программама керткән идек.
Бүген шушы җырны Ильвина башкаруында ишеттем. Беренче тапкыр. Миңа калса, ул да яхшы башкарган. Уңышлар үзенә. Сезнең ишеткәнегез бармы? Языгыз әле», – дигән ул.
«Ни өчен кызганыч?» – дип сораучыларга Зәйнәб Фәрхетдинова сторисларында җавап кайтарган.
«Ни өчен кызганычмы? Кызганыч булмыйча кала алмый инде ул бу тормышта. Хыялда йөрткән, тормышка ашмаган эшләр күп кала бит барыбызның да. Мәсәлән, кемдер кыз көтә, малай алып кайта. Кемдер малай көтеп йөри, кызлар гына була, дигәндәй.
Шунысы кызганыч, үзеңне юк-барга сарыф итү. Интригалар, гайбәтләр һәм башкалар, һәм башкаларга. Сез мине аңлагансыздыр дип ышанам», – дип, читләтеп кенә әйтеп узган ул бу турыда.
