«Айфара» төркеме артистлары Рәшит Максутов, Фәнис Мортазин, Алмаз Мөхәммәтҗанов, Алмаз Шәрифуллинга һәрберсенә Татарстанның атказанган артисты исеме бирелгән. Шундый указны Татарстан Рәисе Рөстәм Миңнеханов имзалаган. «Шәһри Чаллы» газетасы хәбәрчесе бу турыда Алмаз Шәрифуллиннан белешкән:
– Дөресен генә әйткәндә, бу исемне безгә биргәнне белми дә калдык. Аны алыр өчен кайдадыр барып та йөрмәдек, сорамадык та, – дип җавап биргән ул.
Моңа кадәр Алмаз Шәрифуллин газетага биргән зур әңгәмәсендә:
– Миңа бу (атказанган – автор иск.) исемне бирсәләр дә алмыйм! Качып йөрим. Нәрсәгә ул?! Дөресен әйткәндә, бу исемне алу оят та булыр иде. Бу мактаулы исемне лаеклы рәвештә алмаган кешеләр арасында булу да оят! Исемләп әйтмим. Андыйлар бар. Безгә болай да әйбәт, – дип ачылып сөйләгән булган.
