Җырчы Ринат Рахматуллин социаль челтәрдәге сәхифәсендә гаиләсе – кызлары һәм оныгы белән төшкән фотосын күрсәтте.
Җырчы әлеге фотоны берничек тә шәрехләмәгән. Язылучылары гына: «Кызларың, оныгыңмы, Ринат?» – дип кызыксынганнар аннан.
Ринат Рахматуллинның беренче никахыннан ике кызы бар. Ул хатыны белән 2018 елда ук аерылышты. Җырчы «Интертат»ка интервьюда балалары турында:
«Кызларым икесе дә Казанда яши. Олысы инде тормышта, оныкларым бар –- ике малай үстерәләр. Кечкенә кызым Казан юстиция университеты көллиятендә укый, аннары укуын университетта дәвам итәргә җыена. Аңа һәр яклап ярдәм итеп торам. Ул – мине, мин аны бик яратабыз. Әти кызы ул. Кечкенә чакта минем белән җырлап та йөрде әле. Минем белән гастрольләргә чыга, мин аңа җырлар яза идем. 8 класста укыганда кисәк кенә башына уй килде дә: «Әти, мин башка җырламыйм», – диде дә. Үгетләмәдем. Чөнки җырчы булуын үзем дә теләмәдем. Кыз балага җырчы булуның ничек кыен икәнлеген, аларның нәрсәләр аша узганын мин күреп торам. Башка өлкәдә эшләсен. «Җырламыйм» дигәч, сөендем генә», – дип сөйләгән иде.
Бу фотоны Ринат Рахматуллин әле иректә вакытта төшкән булса кирәк.Бүгенге көндә җырчы, исерек килеш автомобиль йөртү һәм юл-транспорт һәлакәте китереп чыгаруда гаепләнеп, колония-поселениедә җәза срогын үти.
