Дубайга ялган турлар сатып, мошенниклыкта гаепләнүче блогерлар – Илүсә һәм Рушан Миңнегалиевлар – социаль челтәрләрдән китүләре һәм үзләренең Гарәп Әмирлекләре гражданлыгы алуларын хәбәр иткән. Бу хакта Телеграм-каналлар яза.
Илүсә үзенең сторисларында май аена кадәр тайм-аут алуы, халык алдына чыкмаячагы хакында сөйләгән. Ә гражданлыкны аларга балалары Гарәп Әмирлекләрендә туганга күрә биргәннәр. Хәзер Миңнегалиевлар әлеге илдә 6 айга 1 тапкыр 90 көн дәвамында бернинди проблемасыз яши ала.
Комментарийларда исә Илүсәнең ялгышуын билгеләп үткәннәр. «Әлеге мөмкинлек гражданлык түгел, ә таныклык булып кына тора. Сезне теләсә кайсы вакытта депортацияләргә мөмкиннәр», – дип язалар комментарийларда.
Соңрак Илүсә гражданлык алулары турындагы постын алып ташлаган.
Әле февраль аенда гына блогерлар алданган туристларга акчаларын кире кайтара башлаулары хакында сөйләгән иде. Алар 1 кешегә нибары 500 сум акча кайтарды. Дубай блогерларының туристларга 27 млн сумнан артык бурычы бар.
