Җырчы Илназ Гарипов инстабитенә ризыкларны өйгә китереп бирү хезмәткәре формасыннан төшкән фотосын куеп, бик серле генә: «Аңлагансыздыр инде», — дип язган.
Илназның инстадуслары арасында җырчыны чынлап та эшкә урнашкан дип аңлап: «Егет кешегә җитмеш төрле һөнәр дә аз. Чын татар егете үз аягы, үз кулы, үз көче белән таба икмәген»;
«Бәйрәм алып барулар бөтенләй беткән, ахры. Карантин шулай итә ул», — дип комментарий калдыручылар булган.
Бер инстачы: «Илназ бу киемнәрне киеп, яңа клип төшерә бугай», — дип фаразлаган.
Шулай ук җырчының язылучылары арасында, пицца, квас һәм сыра сорап, адресларын калдыручылар да очраган.
