Эндр Пенсионн сангин заллтин мобильн клиентск церглт Приютненск района Первомайский поселкд һарч йовв. Урднь эдн эн района Воробьевка селәнә улст цәәлһвр кев.
Эндр Пенсионн сангин заллтин мобильн клиентск церглт Приютненск района Первомайский поселкд һарч йовв. Урднь эдн эн района Воробьевка селәнә улст цәәлһвр кев. Клиентск церглтин мобильн офис селәнә инвалидмудт, нилхтә күүкд улст пенсин тускар кергтә цәәлһвр авч чадв, микроавтобусин салонд дор ормднь кергтә документ һарһулж авцхав. Энүнд иим көдлмш кех цуг таал бәәнә. Мобильн клиентск церглт оньдин ирәд дөн болдгнь эн селәнә бәәрн әмтнд даслт болад бәәв. Эднә келсәр, иим керг эднд эвтә болжана. Воробьевка селән района цутхлнг селәнәс дегд хол биш болв чигн, инвалид улст болн медәтнрт Приютное селәнд одад, Пенсион церглтәс кергтә справк авхд күнд болна. Машиһар ирсн офист цуг кергтә туслмж авч болна. Эн медәтә күүкд күүнә келсәр, эс медсн юмиг цәәлһж өгв, кергтә цаасиг бичж автн гиж келв. Района цутхлнг селәнд одлго, дор ормднь дөн авч болжана. Залу күүнә келсәр, машин бәәнә, тегәд зовлнг уга. талда улс болхла маши үнтәһәр нәәмәдлж авна. Тенд одхла чеерүдт зогсна, больницд одх кергтә болна. Тегәд кергән күцәлго хәрж ирнә. Эн өдр хур орад, киитн болв. Тер бийнь селәнә медәтнр Пенсион сангин офист ирәд, эдниг үүмүлжәх төрмүдәр кергтә цәәлһвр авч чадв. Эднә ик зунь пенсин хоршулһна әнгд цуглрсн мөнгнә кемжәнә тускар соньмсв, иим мөнг яһж авхин тускар сурв, стаж яһж тоолдгин тускар соньмсв. Эн медәтин келсәр, эврәннь стажан бүрткж авхар ирж. Күч-көлснә ветеран авхд күрхий аль угай? Тер мет пенсь чик эс гиж хаһжр тоолжахин медх саната. Үлгүрнь, офисин специалист Анна Николаевна Беликовад пенсин кемжән ямаран кевәр икдснә тускар цәәлһж өгв. Талдан улс болхла тежәлән геесн өрк-бүлмдүт ямаран социальн болн күч-көлснә пенсь өгхин тускар соньмсв. Инвалид улсиг хәләжәх улст ямаран дөнцл мөнг өгдгин тускар сурв. Тер мет экин мөнгиг яһж олзлхин тускар олн улс цәәлһвр авч чадв. Приютненск районд Пенсион сангин специалист Елена Година келсәр, селәнә улст иим дөн сән болна. Нег үлү, района цутхлнг селәнәс хол бәәх Нарта болн Бурата селәдин улст күнд болна. Тенд иим офист күн дала ирнә. Пенсион мобильн офист цуг кергтә оборудовань бәәнә, ксерокопий кеж болх. Эннь медәтнрт сән таалта болжана. Эн өдр Пенсион офисин специалистнр селәнә арвн күүнд цуг кергтә цәәлһвр өгв. Келхд, эн жилин өрәлд Пенсионн сангин мобильн церглт танһчин хөрн дөрвн селәнд одхар зуралжана. Эднәс хамгин холл селәд – Октябрьск района Цаһан Нур болн Хошуд селәд. Давсн жилин ашар иим кевәр долан зун күн пенсион тетклһнә болн социальн дөнцл мөнг авлһна төрмүдәр цәәлһвр авсмн. Эндр болхла Пенсион сангин специалистнр Приютненск района Первомайский селәнд көдлжәнә. Ээнән Ольга, Очра Сергей
